Чернигову - 1300 (сборник архивных материалов и документов)

---

РАЗДЕЛ I - ДРЕВНИЙ ЧЕРНИГОВ

№ 4
ОБ УЧАСТИИ СЕВЕРЯН В ПОХОДЕ КНЯЗЯ ОЛЕГА НА ВИЗАНТИЮ И ДАНИ ГРЕКОВ ЧЕРНИГОВУ

    907 г.
    В лето 6415. Иде Олег на Грекы. Игоря оставив Киеве, поя же множество варяг, и словен, и чудъ, и словене, и кривичи, и мерю, и деревляны, и радимичи, и поляны, и северо, и вятичи, и хорваты, и дулебы, и тиверци, яже суть толковины *: си вси звахуться от грек Великая скуфь. И с сими со всеми поиде Олег на конех и на кораблех, и бе числом кораблей 2000. И прииде к Царюграду; и греци замкоша Суд, а град затвориша. И выиде Олег на брег, и воевати нача, и много убийства сотвори около града греком, и разбиша многы полаты, и пожгоша церкви... и почаша греци мира просити, дабы не воевал Грецкые земли. Олег же мало отступи от града, нача мир творити со царьма грецкима, со Леоном и Александром, посла к нима в град Карла, Фарлофа, Вельмуда, Рулава и Стемида, глаголя: "Имите ми ся по дань". И реша греци: "Чего хощеши, дамы ти". И заповеда Олег дати воем на 2000 корабль по 12 гривен на ключь, и потом даяяти уклады на рускыа грады: первое на Киев, та же на Чернигов, на Переяславль, на Полтеск, на Ростов, на Любечь и на прочаа городы; по тем бо городом седяху велиции князи, под Олгом суще...
    * Толковины - союзники

№ 5
О КНЯЖЕНИИ МСТИСЛАВА В ЧЕРНИГОВЕ И БИТВЕ ПОД ЛИСТВЕНОМ *

    1024 г.
    В лето 6532. Ярославу сущю Новегороде, приде Мъстислав ис Тьмутороканя Кыеву, и не прияше его кыяне. Он же, шед, седе на столе Чернигове...
    Ярослав, приде Новугороду, и посла за море по варягы. И приде Якун с варягы, и бе Якун слеп, и луда бе у него золотомъ исткана. И приде к Ярославу; и иде Ярослав с Якуномь на Мьстислава. Мьстислав же, слышав, взиде противу има к Листвену. Мъстислав же с вечера исполчив дружину, и постави север в чело противу варягом, а сам ста с дружиною своею по крилома. И бывши нощи, бысть тма, молопья, и гром, и дождь. И рече Мъстислав дружине своей: "Пойдем на ня". И поиде Мъстислав и Ярослав противу собе, и сступися чело север с варягы, и трудишася варязи секуще север, и посем наступи Мъстислав со дружиною своею и нача сечи варяги. И быстъ сеча силна, яко посветяше молонья, блещашеться оружье, и бе гроза велика и сеча силна и страшна. Видев же Ярослав, яко побежаем есть, побеже с Якуном, князем варяжьскым...
    И посла Мъстислав по Ярослава, глаголя: "Сяди в своемь Кыеве: ты еси старейшей брат, а мне буди си сторона". И не смяше Ярослав ити в Кыев, дондеже смиристася. И седяше Мъстислав Чернигове.
    * Ныне - село Малый Листвен Репкинского района

№ 6
О СМЕРТИ МСТИСЛАВА ВЛАДИМИРОВИЧА И ПЕРЕХОДЕ ЧЕРНИГОВСКИХ ЗЕМЕЛЬ В СОСТАВ КИЕВСКОГО КНЯЖЕСТВА

    1036 г.
    В лето 6544. Мъстислав изиде на ловы, разболеся и оумре. И положите и в церкви у святаго Спаса, юже бе сам заложил: бе бо вздано ся при немъ взвыше, яко на кони стояще рукою досящи. Бе же Мъстислав дебел телом, чермен лицем, великыма очима, храбор на рати, милостив, любяще дружину повелику, именья не щадяше, ни питья, ни еденья браняше. Посемь же перея власть его всю Ярослав, и бысть самовластецъ Русьстей земли.

№ 7
О РАЗДЕЛЕ ЯРОСЛАВОМ МУДРЫМ ЗЕМЕЛЬ КИЕВСКОЙ РУСИ И ЗАВЕЩАНИИ ЧЕРНИГОВА КНЯЗЮ СВЯТОСЛАВУ

    1054 г.
    В лето 6562. Преставися великый князь русьскый Ярослав. И еще бо живущю ему, наряды сыны своя, рек им: "Се аз отхожю света сего, сынове мои; имейте в собе любовь, понеже вы есте братья единого отца и матере. Да еще будете в любви межю собою, бог будеть в вас, и покорить вы противный под вы. И будете мирно живуще. Аще ли будете ненавидно живуще, в распрях и которающеся, то погыбнете сами, и погубите землю отець своих и дед своих, иже налезоща трудом своим великым; но пребывайте мирно, посещающе брат брата. Се же поручаю в собе место стол старейшему сыну моему и брату вашему Изяславу Кыев; сего послушайте якоже послушаете мене, да той вы будеть в мене место; а Святославу даю Чернигов, а Всеволоду Переяславль, а Игорю Володимер, а Вячеславу Смолинеск".

№ 8
О РАЗГРОМЕ ПОЛОВЦЕВ ЧЕРНИГОВСКОЙ ДРУЖИНОЙ

    1068 г.
    Посемь же половцем воюющим по земле Русьсте, Святославу сущю Чернигове, и половцем воюющим около Чернигова, Святослав же собрав дружины неколико, изиде на ня ко Сновьску *. И узреша половци идущь полк, пристроишася противу. И видев Святослав множьство их, и рече дружине своей: "Потягнем, уже нам не лзе камо ся дети". И удариша в коне, и одоле Святослав в трех тысячах, а половець бе 12 тысяче; и тако бьеми, а друзии потопоша в Снови, а князя их яша рукама, в 1 день ноября. И взвратишася с победою в град свой Святослав...

№ 9
О НАЧАЛЕ СООРУЖЕНИЯ ПЕЩЕР НА БОЛДИНЫХ ГОРАХ

    1074 г.
    И прислав Святослав, в ночь поя Антонья ** Чернигову. Антоний же, пришед к Чернигову, взлюби Болдины горы; ископав печеру, ту ся всели. И есть ту манастырь святое Богородици на Болдиных горах и до сего дни...
    * Ныне пгт Седнев Черниговского района, назывался Сновском до XVI в.
    ** Антоний Печерский - церковный деятель Киевской Руси, один из основателей Киево-Печерского монастыря. Родился в Любече.

№ 10
О МЕЖДОУСОБНОЙ БОРЬБЕ КНЯЗЕЙ

    1076-1078, 1094 гг.
    В лето 6584... Сего же лета преставися Святослав, сын Ярославль, месяца декабря 27, от резанья желве, и положен Чернигове у святаго Спаса. И седе по немъ Всеволод на столе, месяца генваря в 1 день.
    В лето 6585. Поиде Изяслав с ляхы, Всеволод же поиде противу ему. Седе Борис Чернигове месяца мая 4 день, и бысть княженье его 8 дний, и бежа Тмутороканю к Романови. Всеволод же иде противу брату Изяславу на Волынь, и створиста мир, и пришед Изяслав седе Кыеве, месяца иуля 15 день, Олег же, сын Святославль, бе у Всеволода Чернигове...
    В год 6586... И поиде Изяслав с Ярополком, сыном своим, и Всеволод с Володимером, сыном своим. И поидоша к Чернигову, и Черниговци затворишася в граде. Олег же и Борис не бяста. Черниговцем же не отворившимся, приступиша ко граду. Володимир же приступи ко вратом всточным, от Стрежени, и отя врата, и взяша град околний, и пожгоша и, людем же вбегшим в днешний град. Изяслав же и Всеволод слышаста, яко идеть Олег и Борис противу, Изяслав же и Всеволод уранивше, поидоста от града противу Олгови...
    Всеволод же седе Кыеве на столе отца своего и брата своего, приим власть русьскую всю. И посади сына своего Володимера * Чернигове.
    В тот же [1094] год пришел Олег с половцами из Тмуторокани и подошел Чернигову. Володимер же затворися в граде. Олег же приде к граду и пожже около града, и монастыре пожже. Володимер же створи мир с Олгом, и иде из града на стол отень Переяславлю, а Олег вниде в град отца своего. Половци же начаша воевати около Чернигова, Олгови не взбраняющю, бе бо сам повелел им воевати. Се уже третьее наведе поганыя на землю Русьскую...
    Памятники литературы Древней Руси. XI - начало XII в.- М. 1978.- С. 44162. 164, 184, 206, 210, 212, 216.